BUTUAN CITY – Gikumpirma ni Director Liza Mazo sa Office of the Civil Defense kon OCD-Caraga nga seryuso nang ipatuman karon sa mga hingtungdang dapit ning siyudad sa Butuan ang granular lockdown.
Kini base na sa nasabutan sa mga membro sa Regional Inter-Agency Task Force kaganina, aron hingpit nang mapugngan ang padayong pagsaka karon sa COVID-19 cases ning siyudad ilabina ang local transmission.
Gipasabot ni Director Mazo nga sukwahi kini sa gipatuman nng mi-aging mga semana diin duna’y mga barangay nga gipa-ilalom sa mas istriktong community quarantine tungod kay ang ipatuman karon, kabahin man sa ilang zoning containment strategy tungod kay ipatuman lang kini sa lugar nga kinahanglang i-isolate.
Mala-umon ang opisyal nga higayong matapos na ang ipatumang istratihiya, makita gyod ang epektibong pagkunhod sa mga kaso sa COVID-19 ning siyudad.
