BUTUAN CITY – Tingkagol karon sa karsel sa Butuan City Police Station 2 ang usa ka ginang ug ang iyang kabit human nasakpan sa iyang bana uban sa kuyog niining mga pulis nga nagtagay sa lawasnong kalipay kaganinang ala-una sa kaadlawon sa Cajoles boarding house nga sakop sa may P-7, Brgy. Holy Redeemer ning siyudad sa Butuan.
Sigon sa 36-anyos nga reklamanteng si alyas Billie Boy, minyo, laborer ug residente sa Valencia City, Bukidnon, nagduda na siyang duna na’y laing kalipay ang iyang 37-anyos nga asawang gitago lang sa panglang Inday, residente sa susamang dapit, human na-usab ang tinagdan niini ngadto kaniya hangtud nga kalit lang kining nahanaw sa ilang lugar.
Nakadawat na lang siya og impormasyon sa nahimutangan niini ka-uban ang 45-anyos niining kabit nga si alyas ‘Noel’, minyo usab, usa ka vendor ug taga-Sugcungan President Roxas, Cotabato City.
Sa ilang pag-abot sa dapit nga gitudlo ngadto sa banang si Billie Boy kuyog ang mga pulis, nasapon nilang nagkamulo og tagay sa lawasnong kalipay ang duruha rason nga dali-dali sila ang nagsuot sa ilang underwear human nasakpan sa mismong lawak nga ilang gi-abangan ug gidala na sa police station alang sa pagpasaka na og kasong adultery.
