BUTUAN CITY – Hingpit nang nakagawas ning adlawa gikan sa pag-isolate si Fr. Joesilo Amalla – ang kura paruko sa San Vicente Chapel ning siyudad human ang 14 ka adlaw nga quarantine dihang nagpositibo sa COVID-19 sa iyang pagpa-uli gikan sa kauluhang Manila partikular sakumbento sa Quiapo.
Sa eksklusibong pakighinabi sa Bombo Radyo Butuan, wala’y pagpanukong gisaysay ni Fr. Joesilo Amalla ang iyang kasinatian dihang nakumpirma sa iyang pagpa-uli dinhi sa dakbayan sa Butuan nga nagpositibo siya sa COVID-19.
Gipadayag ni Fr. Amalla nga mipa-uli siya dinhi sa Butuan niadtong Hunyo 13 human nagnegatibo sa rapid test sa Quiapo niadtong Hunyo 10.
Bitbit ang gikinahanglang mga papeles, mipa-uli siya agi sa Cagayan de Oro City sakay sa commercial flight nga iyang gituyo tungod kay high risk matud pa alang kaniya kung musakay sa sweeper flights o kaha sa barkong gi-andam alang sa mga locally stranded individuals kon LSIs.
Bisan og iyang gikakurat ang pagderetso kaniya sa isolation facility sa Brgy. Baan Km.3 , wala siya’y bagutbot nga misunod niini apil na sa mga prosesong iyang naagi-an.
Aminado siyang nakuratan siya dihang migawas sa rapid ug swab tests ning siyudad ang pagpositibo niya sa coronavirus rason sa pag-quarantine kaniya og 14 ka mga adlaw sa Butuan Medical Center annex.
Iya matud pang gikalingawan sulod sa maong mga adlaw ang pagpatay sa mga langaw ug mga lamok nga masaag sa iyang kwarto hangtud nga nagnegatibo na siya sa gihimong mga follow-up tests.
Dihang gipa-andam na siya alang sa gikatakda niyang pag-discharge, nakapamisa pa siya sulod sa Butuan Medical Center nga gitambungan usab sa mga bakanteng personahe niini.
