BUTUAN CITY – Opisyal nang gidawat ni Pope Leo XIV ang “Fisherman’s Ring” kon Piscatory Ring, nga nagsimbolo sa kagahom sa Santo Papa isip hulip ni San Pedro. Gihimo ang seremonya human sa Mass of Inauguration kagahapon Dominggo, Mayo 18, sa St. Peter’s Square.
Mismong si Pinoy Cardinal Luis Antonio Tagle, ang Pro-Prefect ng Dicastery for Evangelization, ang nagsul-ob sa singsing ngadto sa tudlo sa Santo Papa.
Ang pagdawat sa singsing, usa sa nag-unang parte sa pagsugod sa usa ka bag-ong Santo Papa, ug gikonsiderang makasaysayanon, timaan sa iyang ka-akuhan sa Simbahang Katoliko.
Ang singsing naghandom kang San Pedro, ug nagsalamin sa iyang katungdanan isip unang Papa, base sa Mateo 16:19, kondiin gihatag kang San Pedro ang mga yawe sa gingharian sa Langit, ingon man sa Lucas 22:32, kondiin gitahas ni Hesus kang San Pedro nga pakusgon ang pagtuo sa iyang mga igsoon.
Ang Piscatory Ring, nga nagsugod niadto pang ika-13 nga siglo, gigamit na kaniadto isip signet ring sa pagselyo sa mga opisyal nga dokumento hangtud sa tuig 1842, apan karon gigamit na lang sa seremonyal nga paagi.
Sa iyang pagpamulong, gipasalamatan ni Pope Leo ang tanan ug ang Balaang Espiritu sa pagtuboy kaniya aron maoy manguna ug magdumala sa Simbahang Katoliko.
