BUTUAN CITY – Gikasubo sa Filipino community sa Monterey Park sa California, USA, ang mass shooting nga natigayon pila ka oras human ang Chinese New Year’s celebration nga mikalas og napulo ka tawo ug mi-angol usab sa lain pang uban.
Sa eksklusibong pakighinabi sa Bombo Radyo Butuan, gipadayag ni Bombo international correspondent Ferdinand Nakila direkta sa Los Angeles, California, nga kini na ang ikalima nga mass shooting incident nga natigayon sa ilang nasud karon lang tuiga ug ang pinakaduguon.
Gibutyag pa niini nga dako ang posibilidad nga duna’y mental health problem ang responsable sa maong kremin tungod kay wala matud pa’y tarong nga tawo nga mamusil sa lugar nga duna’y daghang tawo ug duna usa’y selebrasyon.
Gawas pa, ang mga gagmay matud pa nga mga night clubs sama sa dapit nga nahitabuan, wala namatud pa’y himuong pagkapkap ang mga bantay sa mga tawong manulod ug wala usab sila’y metal detector aron unta mapugngan ang mga tawong duna’y dalang armas ug mga ha-it nga hinagiban.
Gani bisan ang mga gwardiya sa mga gagmay’ng establisamiento sama sa dapit nga nahitabuan, batuta lang ang dala.
