BUTUAN CITY- Napahiluna na ang patay’ng lawas sa fetus nga napalgang gilubong kilid sa sapa sa may Purok 7 Brgy. Maygatasan, Bayugan City, Agusan del Sur. Sumala sa Barangay Health Worker kon BHW sa maong dapit nga si Melanie Morre, gikumperma na sa doktor sa maong syudad nga tulo ngadto sa upat ka bulan na ang nasangpit nga fetus kansa napalgan sa mga bata nga nangaligo kilid sa sapa sa maong barangay.
Gitu-uhang gikaon na usab sa mga iro ang ulo ug duha ka mga abaga sa maong fetus dihang kini nakit-an. Sumala sa maong BHW, igo ra matud pang gitabunan ang maong bata og balas rason nga nakubkob ra kini sa mga iro.
Wala usab sila’y nakita nga dugo o inunlan sa palibot niini.
Ang pamahayag ni Melanie Morre.
Sigon sa mga residente sa maong lugar, aduna matud pa sila’y nadungog nga nag-motorsiklo sa maong dapit sayo sa buntag niadtung adlaw nga napalgan ang maong biktima, apan wala ra nila kini gipansin niiini tungod kay daan namang daghang mga motorsiklo ang mosulod sa maong sapa.
