BUTUAN CITY – Duha ka commercial vessels ang nalunod duol sa Strait of Hormuz human na-igo sa mga pag-atake sukad ning mi-aging mga adlaw, samtang nagkagrabe ang tensiyon ug pag-atake batok sa mga barkong pangkomersiyo nga moagi sa maong estratehikong agi-anan sa dagat.
Usa sa mga barko mao ang Singapore-flagged container ship nga GFS Pride, nga na-igo sa wala pa ma-ilhing projectile samtang nagbiyahe sa Strait of Hormuz kagahapong adlawa rason nga naka-angkon kini og kadaot ug nasunog sa wala pa kini na-unlod.
Hinuon naluwas ug nahikling ang tanang 21 niini ka mga tripulante ug wala’y namatay o nasamdan.
Ang ikaduhang barko, ang Cape Dao, usa ka dry bulk carrier nga naka-flag ubos sa Antigua and Barbuda, naigo sa projectile niadtong Septiyembre 23 hangtud nga na-unlod duol sa Strait of Hormuz kondiin usa ka tripulante ang namatay samtang ang ubang sakay niini, luwas nga nabakwit.
Samtang lahi usab nga insidente ang gitaho sa Iran diin usa ka cargo ship nga adunay kapin 2,500 ka container ang gika-ingong naigo sa naval mine ug nasunog sa wala pa nalunod sa habagatang bahin sa Strait of Hormuz.
Sigon sa Iranian Revolutionary Guard Corps, ang maong barko misulay sa pagtabok gamit ang delikado ug dili awtorisadong ruta.
Wala pa makumpirma kung mao ba kini ang susamang barko nga gitaho sa Singapore nga na-unlod.
Ang sunod-sunod nga insidente nakapadugang sa peligro alang sa mga commercial vessels nga moagi sa Strait of Hormuz, usa sa pinaka-importante nga maritime routes sa kalibotan.
Tungod sa mga pag-atake, nagkagrabe ang kabalaka sa seguridad sa mga tripulante ug sa padayon nga pagbiyahe sa mga barkong nagdala og mga produkto ug enerhiya.
Padayon usab nga gibantayan sa mga maritime authorities ang sitwasyon samtang nagkadaghan ang mga insidente batok sa commercial shipping sa maong lugar.
