BUTUAN CITY – Patay nang napalgan kaganina ang duha ka mga batang lalaki nga una nang nalumos kagahapon, Biyernes sa alas-tres sa hapon dihang namasol ug naligo sa Agusan River partikular sa Purok 5, Brgy. Bit-os ning siyudad sa Butuan.
Sigon ni Kapitan Imelda Sheila Fontimar, gi-asuy sa usa ka batang babaye nga naluwas gikan sa pagkalumos nga una matud pang mitidlom ang 8-anyos nga si CJ rason nga dihang nakita kini sa 13-anyos nga si Mark Kyle, iya kining gidali paggunit.
Dihang nakita matud pa kini sa batang babaye, gisulayan na usab niya kini pagluwas apan silang tulo nadala sa kusog nga lilo sa tubig apan naswertihan ang batang babaye dihang kini daling naluwas sa nakakita kanila.
Napalgan matud pa kagahapon sa alas-kwatro sa kaadlawon ang usa sa mga biktima nga gisundan usab sa lain pa, diha ra mismo tungod sa ilang nalumsan.
Tungod sa dili lalim nga insidente, nanawagan si Kapitan Fontimar ngadto sa tanang mga ginikanan nga monitoron kanunay ang ilang mga anak ug dili tugutang mu-anha sa suba kung wala’y ka-uban nga hamtong nga makamaong mulangoy.
