BUTUAN CITY- Mikalas sa 7 ka kinabuhi lakip na ang tulo ka mga bata ang pagbusikad sa usa ka drone diha sa baybayon sa habagatang parte sa Russia. Makita ang usa ka drone nga kusog kaayong mipadulong sa pangpang sa wala pa kini mibusikad ug nahimong bola sa kalayo didto sa baybayon samtang nagtan-aw ang mga turista gikan sa balas ug sa tubig.
Ang kinatibuk-ang gidaghanon sa mga naangol misaka sa 40 ka tawo, diin 17 niini ang gidala sa ospital, sumala pa ni Veniamin Kondratyev, ang gobernador sa rehiyon sa Krasnodar.
Giakusahan sa opisyal ang Ukraine nga mihimo og “tinuyo nga pag-atake sa mga sibilyan.” Wala pa miluwat og pamahayag ang Ukraine bahin niini diin ang duruha ka panig nanghimakak nga gituyo nila pag-target ang mga sibilyan.
Dili pa klaro kung unsa gyud ang gi-target sa maong drone. Ang pagkahagsa nahitabo sa usa ka baybayon duol sa baryo sa Arkhipo-Osipovka sa Black Sea.
