BUTUAN CITY – Gipadayag ni Department of Interior and Local Government kon DILG Sec Jonvic Remulla nga ang Department of Justice na ang magdesisyon kung makonsidera bang kakunsabo si Senador Robin Padilla sa pag-ikyas ni Senador Ronald dela Rosa.
Base sa CCTV footage, nakita si Padilla nga mikuyog kang dela Rosa ug usa ka babaye pagsakay sa iyang SUV ug migawas sa Senate complex human sa insidente sa pagpamusil niadtong Mayo 14.
Apan, depensa ni Padilla, wala matud pa maglikay si dela Rosa sa iyang responsibilidad ilabina nga tensyonado ug dili klaro ang sitwasyon human sa pagpamusil.
Gawas pa, nahadlok lang sila alang sa ilang seguridad tungod sa presensya sa mga armadong personnel gikan sa lain-laing grupo.
Sa pagkakaron, wala pa’y pormal nga kaso batok kang Padilla samtang ang DOJ, nag-imbestiga ug nagkolekta sa mga ebidensya aron mahibal-an kung aduna ba’y legal nga liability o wala ang kanhi aktor nga senador.
