BUTUAN CITY- Giklaro sa Department of Health (DOH) nga dili nila suspendihon ang dugay nang gipatuman nga National Deworming Program bisan pa sa pagkamatay sa usa ka Grade 4 nga estudyante sa Cavite, tungod masaligon matud pa ang mga niini nga luwas ug epektibo ang paggamit sa albendazole batok sa intestinal worms.
Sumala ni DOH spokesperson Undersecretary Albert Domingo, wala pa mapamatud-i nga ang tambal maoy direktang hinungdan sa kamatayon sa bata tungod gihulatan pa resulta sa autopsy nga gihimo sa National Bureau of Investigation (NBI).
Hinuon, mipasalig ang departamento nga mas palig-onon ang pagpatuman sa programa pinaagi sa mas klarong pagpahibalo sa mga ginikanan bahin sa posibleng side effects sa tambal ug sa angay buhaton kon adunay dili maayong reaksyon.
Gidasig usab ni Domingo ang mga ginikanan nga siguruhong ma-hydrate ang ilang mga anak ug dal-on dayon sa doktor kon makasinati og sintomas sama sa sakit sa tiyan o pagsuka human sa deworming, samtang gipasiugda nga importante gihapon ang programa sa paglikay sa malnutrisyon ug paglangan sa pagtubo sa mga bata tungod sa intestinal worms.
