BUTUAN CITY – Anaa pa karon sa close monitoring sa mga Filipino community nga atua sa Israel ang Migrant Workers’ Office sa maong nasud ilabina nga wala pa nagpagawas og alert level ang Department of Foreign Affairs kon DFA sa nasangpit nga nasud human gi-atake sa militanteng Hamas sugod niadtong Sabado.
Sa eksklusibong pakighinabi sa Bombo Radyo Butuan, gibutyag ni Department of Migrant Workers kon DMW-Caraga officer-in-charge regional director Ritchel Butao nga wala pa sila’y nadawat nga mga concerns gikan sa pamilya sa mga OFWs nga taga-Caraga ilabina sa hangyong repatriation sa ilang mga kabanay nga atua sa maong nasud.
Samtang sa panig usab sa Gaza Strip, giklaro sa opisyal nga duna’y mga personahe ang Philippine Embassy ug Philippine Consulate nga gibutang sa mga estratihikong lugar nga mahimong dangpan sa mga OFWs nga gusto nang magpa-repatriate ubos sa kasabutang border-to-border lang ang pagkuha kanila uban sa pakig-alayon sa host country.
Gidugang pa ni Butao nga hangtud sa pagkutlo niini nga balita, wala pa nabalik ang Balik Manggagawa Program sa kagamhanan sa Pilipinas tali sa Israel human kini naputol sa hinapos nga bahin ning tuiga tungod sa mi-init nga kagubot.
Ang mga OFWs matud pa nga atua karon sa Israel, mao kadtong napadala sa gobyerno ilalom sa government-to-government hiring nga kadaghanan mga home care-givers, care workers ug mga hotel workers.
