BUTUAN CITY – Pareho nang andam na ang Provincial Disaster Risk Reduction and Management Offices kon PDRRMO sa Dinagat Islandsa ug Surigao del Norte provinces alang sa impact nga dala sa bagyong Ambo nga gila-umang masinatian nila sugod karong gabii.
Sigon ni Surigao del Norte Provincial DRRM officer Gilbert Gonzales sa eksklusibong pakighinabi sa Bombo Radyo Butuan, sama sa Dinagat Islands partikular nga gipatutukan ni Governor Francisco Matugas ang mga lugar nga prone sa landslides og pagbaha.
Apil sa gimando sa gobernador ang pagdili una sa mga gagmay’ng sakyanang pandagat paglawig sa kadagatan tungod kay mumugna og igo-igong gidak-on sa balud sa kadagatan ang daut nga panahon.
Hinuon giklaro niini nga wala’y kanselasyon sa biyahe sa mga sakyanang pandagat apan depende gihapon kini sa mamahimong mando unya sa Philippine Coast Guard ilabina sa mga rutang mainland Surigao ngadto na sa Dinagat Islands ug Siargao Islands og vice versa.
