BUTUAN CITY – Gipahayag sa Malacañang nga ang desisyon sa Commission on Audit (COA) nga mag-disallow sa Php 73 milyon nga confidential funds sa Office of the Vice President (OVP) niadtong 2022, nagpakita sa padayon nga pagpalig-on sa accountability sa paggamit sa pondo sa gobyerno.
Sumala kang Palace Press Officer Claire Castro, gisalikway sa COA ang pahayag nga husto ug transparent ang paggamit sa maong pondo sa opisina ni Vice President Sara Duterte.
Gibutyag pa niini nga importante ang paspas nga aksyon sa mga ahensya sama sa Commission on Audit ug Anti-Money Laundering Council (AMLC) aron maseguro ang pagpanubag sa bisan kinsa nga mapamatud-ang adunay sala.
Base sa taho, apil sa gi-isyuhan og notice of disallowance ang Php 69.787 milyon nga gigamit para sa rewards ug Php 3.5 milyon alang sa pagpalit og mga kagamitan.
Gisugo usab ang OVP nga ibalik ang maong kantidad ngadto sa gobyerno.
