BUTUAN CITY – Luwas nga naka-abot ang delegado sa rehiyon sa Caraga para sa Palarong Pambansa 2017 sa probinsiya sa Antique.
Kini ang gikumpirma ni Elizalde Bernales, Regional Information Officer sa Department of Education kon DepEd-Caraga sa pakighinabi ning sibyahan.
Sigon ni Bernales, sa niaging hapon sila naka-abot sa ilang billeting quarters sa lungsod sa Patnongon sa maong probinsiya diin gitunga sa duruha ang ilang delegado, sa Lirio National Highschool ug sa Caritan Central School.
Sa pagkabuntag sa Lunes, kagahapong adlawa, gelayong mipailalom sa pagbansay-bansay ang mga athleta gawas lang sa mga players sa basketball tungod kay wala may basketball court ang Caritan Central School.
Maayu nalang matud pa kay dunay mga kapitan sa kasikbit nga barangay nga mihanyag sa ilang kurto aron magamit sa mga langyaw’ng delegado.
Mapasalamaton usab ang opisyal sa nakitang hugot nga seguridad sa mga delegado diin sa billeting kwarter sa Caraga ug sa gawas nga bahin, dunay mga pulis ug barangay tanod nga 24 oras nga nagseguro sa ilang kaluwasan.
Samtang sa hisgutanang pagkaon, gibutyag ni Bernales nga mag-download sila ug mga hulagway sa mga pagkaon nga ilang gibayang sa mga athleta.
Kini aron makita sa tanan ilabina sa mga ginikanan sa mga athleta nga gipangandaman nila pag-ayu ang pagkaon sa mga delegado.
Gane, 5 ka cook ang ilang gi-hire aron maseguro nga luwas ang gi-andam nga mga pagkaon.
Nag-apod-apod usab sila ug vitamins og tubig panglikay sa dehydration sa mga athleta.
Dunay kauban usab sila nga 5 ka mga nurses ug 2 ka doktor gawas pa sa lokal nga kagamhanan sa maong probinsiya nga andam mohatag ug medikal assistance.
