BUTUAN CITY – Padayon pang nagpa-alim sa balay-tambalanan ang walo ka mga pasahero sa usa ka multicab human mabanggaan sa usa ka forward truck kaganinang buntag sa may Purok 5, Brgy. Bancasi ning siyudad sa Butuan.
Nasayrang ang multicab nga gimanehuan ni Philip Allen nga taga-Buenavista, Agusan del Norte, padulong unta ning siyudad sa Butuan apan pag-abot sa dapit nga nahitabuan, gidumbol kini sa forward truck nga iya sa Pilmico og gimanehuan ni Ricardo Rara.
Sigon sa usa sa mga pasaherong si Leizel Pequit, kalit lang matud pang mitunga sa ilang lane ang trak nga panaog na gikan sa SUGECO og tungod sa kakalit sa maong hitabo rason nga wala gilayon kini malikayi sa driver sa ilang gisakyang multicab.
Naka-angkon og mga samad sa nagkada-iyang parte sa lawas ang mga biktima tungod sa pagkalumping sa tuong bahin sa maong sakyanan.
