BUTUAN CITY – Panahon na aron tas-an ang daily minimum wage sa Caraga Region nga sa kasamtangan anaa sa 350-pisos.
Sa eksklusibong pakighinabi sa Bombo Radyo Butuan, gipadayag kini ni Wilson Fortaleza, deputy secretary general ug tigpamaba sa Partido Manggagawa, human nasuta sa pinaka-ulahing pagtuon nga taas kaayo ang poverty rate ning rehiyon nga mi-abot sa 33.2-porsiento kumpara sa national poverty rate nga mi-abot sa 21-porsiento.
Alayon niini, nanawagan siya sa mga trabahante ning rehiyon nga magduso na og wage hike petition ngadto sa Regional Tripartite Wages and Productivity Board kon RTWPB aron itakda gilayon ang pagdungog niini.
Hinuon giklaro sa opisyal nga bisan og wala’y magduso og wage hike petition, mhimong makatakda og motu proprio hearing ang RTWPB.
Gi-awhag usab niini ang tanang mga trabahante nga magmugna og unyon aron dali rang madunggan ang ilang mga yangungo nga kinahanglang ilhon usab sa kadumalahan sa kompanya o kaha sa ilang employer.
