Covered Court sa Ateneo de Davao University Senior High School, ipangalan kang Rene “Bobet” Baterbonia

BUTUAN CITY- Gi-anunsyo ni Ateneo de Davao University kon AdDU President Father Karel San Juan nga ipangalan kang Palarong Pambansa 2025 MVP ug Surigao del Sur Basketball Pride Rene “Bobet” Baterbonia ang covered court nga anaa sa sulod sa Ateneo de Davao Senior High School Campus sa Bangkal, Davao City.

Sumala sa opisyal, ang maong covered court tawagon na og Rene “Bobet” Baterbonia Covered Court kon RBBCC kansa magsilbing handumanan sa ilang kanhi student-athlete. Butangan usab ang maong covered court og mga hulagway ni Bobet.

Ang pahayag ni San Juan gihimo atol sa katapusang haya ni Bobet kagahpon sa gabie sa iyang Alma mater ayha kini dalhon sa iyang hometown sa Talagocon, Agusan del Sur karung adlawa, Hunyo 15.