BUTUAN CITY- Nanawagan ang Commission on Human Rights kon CHR, atol sa pagsaulog sa Zero HIV Stigma Day niadtong Hulyo 21, sa tanang Pilipino nga batukan ang diskriminasyon batok sa mga tawo nga adunay HIV o Human Immunodeficiency Virus ug suportahan ang ilang katungod sa dignidad, patas nga pagtratar, ug akses sa serbisyong panglawas.
Sumala sa Department of Health (DOH), adunay 4,633 ka bag-ong kaso sa HIV sa unang kwarter sa 2026, kansa ubos og 9 porsyento kumpara sa miaging tuig, apan nagpabilin gihapon nga kabalaka ang taas nga ihap sa mga batan-on nga natakdan, ilabina ang pagsaka sa kaso sa mga menor de edad.
Gipasiugda sa CHR nga ang stigma maoy usa sa dagkong babag sa HIV testing ug pagtambal, busa gidasig niini ang publiko nga suportahan ang sayong pagpa-test ug ang kampanya batok sa sayop nga pagtuo bahin sa HIV.
Gidayeg usab sa Komisyon ang mga lakang sa DOH ug mga kauban niini sa pagpalapad sa HIV testing, pagtambal, ug suplay sa antiretroviral medicines (ARVs), samtang gipahinumdoman ang tanan nga ubos sa Republic Act No. 11166, gipanalipdan sa balaod ang mga adunay HIV batok sa diskriminasyon ug gisiguro ang kompidensyalidad sa ilang medikal nga rekord
