BUTUAN CITY – Magpagawas og memorandum ang Commission on Elections kon COMELEC-Caraga aron mahatagan na og katumanan ang plano ni COMELEC chairman George Erwin Garcia nga mabutangan og voting precinct ang komunidad sa Socorro Bayanihan Services Inc kon SBSI sa Sitio Kapihan, Brgy. Sering, lungsod sa Socorro, Surigao del Norte alang sa May 2025 midterm elections.
Sa eksklusibong pakighinabi sa Bombo Radyo Butuan, gibutyag ni Commission on Elections kon COMELEC-Caraga regional director Francisco Pobe nga duna na’y gibana-banang 3-mil ka mga rehistradong botante ang maong komunidad rason nga kinahanglang magpabarog sila bisan og make-shift voting precinct lang.
Kini aron dili namahasol sa pagbiyahe ang mga botante panahon sa eleksyon sa ingon diha na lang himuon ang voting process sa maong komunidad.
Gidugang pa ni Pobe nga higayong ma-relocate na ang mga residente sa maong sitio adiser ang eleksyon, didto sila mubotar sa lugar diin sila ma-relocate samtang kadtong mabalhin sa lugar nga duol lang gihapon sa Sitio Kapihan, didto ra sila mubotar sa ilang mugnaong makeshift voting precinct.
