BUTUAN CITY – Gila-uman nang daan ni Atty April Joy Balano, election supervisor IV sa Commission on Elections on COMELEC-Agusan del Norte nga dili mudagsa ang mga tawo sa katapusang adlaw sa voter’s registration kagahapon alang sa 2026 Barangay ug Sangguniang Kabataan Elections.
Sa eksklusibong pakighinabi sa Bombo Radyo Butuan, gipadayag sa opisyal nga kini tungod kay subsob na ang ilang pagpahigayon og satellite registration sa kabaranggayan.
Apil matud pa sa gisudlan sa ilang mga election officers ang mga tunghaan, kamerkaduhan ingon man mga ospital aron lang masiguro nga makabotar ang dakong porsiento sa mga Agusanons sa umalabot nga eleksyon karong Nobyembre 2 ning tuiga.
Sigon sa opisyal, ubay-ubay ang nadugang sa ilang listahan sa mga botante sukad gisugdan ang rehistrasyon niadtong Oktubre ning mi-aging tuig ug dihang ilang gisuma-total niadtong Enero ning tuiga, mi-abot na sa kapin 480-mil ang ilang mga regular voters samtang kapin sa 173-mil usab sa mga Sangguniang Kabataan kon SK voters.
Gikan matud pa sa datus nga ilang nakuha niadtong Abril hangtud ning mi-aging adlaw, mi-abot sa halos 5-mil ka mga regular voters ang nadugang sa ilang listahan samtang 2,300 usab sa SK voters.
Base sa ila matud pang nadawat nga guidelines gikan sa ilang sentrong buhatan niadtong Biernes, kutob lang gayod sa alas-singko kagahapon sa hapon ang rehistrasyon.
