BUTUAN CITY –Nagpakisayod na usab ang Commission on Human Rights (CHR) mahitungod sa pagkamatay ni Cadet Vince Andrew Delos Reyes, 19 anyos ang panuigon, ug kadete sa Maritime academy sa Calamba, Laguna.
Sumala sa taho nga grabeng ehersisyo matud pa ang gikamatyan niini, kini human gisilotan sa iyahang labaw.
Sigon ni CHR Chairperson Richard Palpal-latoc, gikundena sa ilahang buhatan ang maong panghitabo, gipaabot usab niini ang ilahang pahisubo ngadto sa nabiling pamilya sa maong kadete.
Sigon sa inisyal nga taho, aksedente matud pang nakapadala og “thumbs up” si Cadet Delos Reyes sa usa ka group chat sa mga cadet corps, kansa wala magustuhi sa kaubanan niining labaw kaniya.
Isip silot, gipa ehersisyo matud pa ang nasangpit nga Kadete human sa panihapon.
Nawad-an og panimoot si Delos Reyes tungod sa grabing ehersisyo niini, rason nga gidala kini sa infirmary.
Tungod kay wala na’y response ang lawas niini, dali kining gidala sa ospital, asa siya gideklarang dead on arrival.
Gipanawagan usab sa CHR ang lawom nga imbestigasyon sa nasangpit nga insidente ug gimanduan ang mga otoridad nga kinahanglang makab-ot sa pamilya sa namatay nga kadete ang hustisya.
Alayon niini, naghimo og motu proprio investigation ang nasangpit nga ahensya pinaagi sa regional office niini sa Rehiyon IV.
