BUTUAN CITY – Patay atol sa iyang pag-livestream ang 24-anyos nga Chinese live streamer nga si Pan Xiaoting, kinsa naila sa mukbang o sobra nga pagkaon atol sa livestream, human nga wala na matud pa makaya sa iyang lawas ang sobra nga pagkaon samtang nag-live.
Niadtong 2020, gipahugtan sa China ang mga mukbang videos ug livestreams aron mapugngan ang sobrang pagkaon ug pag-usik sa pagkaon apan daghan gihapon ang nagbuhat og mukbang aron makakuha og viewers ug kwarta.
Si Pan kaniadto waitress lamang, apan nakakita siya nga daghang mukbang streamers ang midato pinaagi sa livestreams ug gifts gikan sa fans rason nga misulay usab siya sa mukbang.
Sa pagsugod, lisod para niya ang pagdani og viewers apan dihang nagsugod siya og kaon og mas daghang pagkaon, nidaghan usab ang iyang followers.
Sa ulahi, gibiyaan niya ang iyang trabaho aron full-time na nga mukbang streamer. Bisan pa sa mga pasidaan sa iyang ginikanan ug viewers bahin sa peligro sa sobra nga pagkaon, padayon gihapon siya sa paghimo og extreme challenges sama sa pagkaon sulod sa 10 ka oras ug pagkaon og sobra 10 kilos nga pagkaon matag livestream.
Tungod sa iyang lifestyle, misaka ang iyang timbang ngadto sa mga 300 kilos.
Na-ospital usab siya tungod sa gastric bleeding nga gika-ingong resulta sa sobra nga pagkaon, apan paghuman sa tambal mibalik gihapon siya sa pag-stream.
Sumala sa report, nakit-an sa autopsy nga puno pa og wala matunaw nga pagkaon ang iyang tiyan ug grabeng naapektuhan ang iyang abdomen.
Ang iyang pagkamatay karon gihimong pasidaan alang sa uban pang mukbang streamers nga nagbutang sa ilang panglawas sa peligro alang sa kwarta ug online attention.
