BUTUAN CITY- Gipanghimakak ni Miss Universe Philippines 2022 Celeste Cortesi ang mga taho nga nagbulag na sila sa iyang British tech entrepreneur boyfriend nga si Jonathan Sterling human mikaylap ang mga espekulasyon nga nalambigit kini sa usa ka kanhi beauty queen.
Pinaagi sa iyang Instagram Story, gipakita ni Celeste ang usa ka hulagway nilang duha ug gipatin-aw nga lig-on ug maayo ang kahimtang sa ilang relasyon. Sumala pa niini, ang ilang prayoridad karon mao ang pag-atiman sa ilang nagkadakong pamilya ug pag-andam sa pag-abot sa ilang anak nga si Sergio, nga ginganlan sunod sa iyang namatay nga amahan.
Samtang mikaylap usab ang mga report nga gipasanginlang gibiyaan ni Jonathan si Celeste alang kang Bianca Manalo, dali kining gisalikway sa talent agency ni Bianca ug giingong walay kamatuoran ang maong mga alegasyon, samtang nagpabiling single ang aktres ug walay kalabutan sa isyu nga naglambigit sa magtiayon.
Sa pagkakaron, klaro ang mensahe ni Celeste nga nagpadayon ang ilang malipayon nga panag-uban ug nakatutok sila sa kaayohan sa ilang pamilya.
