BUTUAN CITY- Epektibo na ang ceasefire o hunong-binombahay tali sa Israel ug Lebanon kagahapon Abril 17. Gilaomang makapahunong kini og 6 ka simana nga panagbangi tali sa Israel ug Lebanese armed group nga Hezbollah.
Taliwa usab sa pagka-epektibo sa ceasefire kagahapon sa sayong kabuntagon, local time, padayon nga mingbuhi og rocket ang Hezbollah sa northern Israel samtang gitaho usab nga nagpadayon ang mga pag-atake sa Israel paglabay sa tunga nga oras dihang nahimong epektibo ang ceasefire. Gi-insistar usab sa Israel nga magpabilin ang ilang mga tropa sa mga lugar nga ilahang gi-okopar sa southern Lebanon.
Adunay mga Lebanese na usab ang nagsugod sa pagbalik sa southern Lebanon kansa nahimong sentro sa mga pag-atake sa Israel, ug gituohang kuta ug daghang presensiya sa Hezbollah. Samtang, daghang katawhan usab sa nagkandaiyang parte sa Lebanon ang nagcelibrar sa mga kalsada human mahimong epektibo ang ceasefire.
Kinasing-kasing usab nga gidawat sa Iran ang 10-day ceasefire apan nanawagan alang sa hingpit nga pag-atras sa mga tropa sa Israel gikan sa Lebanon. Positibo usab si US President Donald Trump nga aduna nay kasabutan aron tapuson ang gubat sa Iran human sa kasabutan sa hunong-buto tali sa Israel ug Lebanon. Kini taliwa na usab sa gilaomang pagpadayon sa mga negosasyon karung weekend.
