BUTUAN CITY – Giawhag ni Cardinal Jose Advincula ang mga magtutuo nga Pilipino nga mag-ampo alang sa pagtapos sa gubat sa Middle East, labi na alang sa mga overseas Filipino workers (OFWs) ug ilang mga pamilya nga naapektuhan sa kagubot, apil na usab ang pagsaka sa presyo sa gasolina.
Sa iyang homiliya atol sa selebrasyon sa Passion of the Lord didto sa Manila Cathedral niadtong Biyernes Santo, iyang gisusama ang mga sakripisyo ni Hesus sa krus sa kahimtang sa mga tawo nga naapektuhan sa gubat.
Sumala pa niini nga bisan layo kini gikan kanato, mabati gihapon nato ang epekto niini.”
Gitumbok sa Cardinal ang pagkaguba sa mga siyudad ug ang pagkawala sa daghang kinabuhi tungod sa gubat.
Gidugang usab niini ang kahadlok sa mga pamilya sa OFWs alang sa ilang mga minahal, ug ang kalisod sa mga drayber sa pagpaningkamot sa ilang adlaw-adlaw nga panginabuhian tungod sa taas nga presyo sa petrolyo.
Gibutyag pa niini nga ang Good Friday usa ka pahinumdom sa mga Katolikong magtutuo nga buhaton ang tulo ka butang: maghilom ug magpamalandong, moambit sa kasakit sa uban, ug mag-ampo alang sa kalinaw.
Giawhag niya ang mga magtutuo nga magpamalandong, magpakita og kalooy, ug mag-ampo alang sa kalinaw.
Sa katapusan, nanawagan siya alang sa kalinaw pinaagi sa pag-ampo, nga nagsuporta sa panawagan ni Pope Leo XIV nga tapuson na ang gubat.
