BUTUAN CITY – Hilabinan ang pagsadya sa kinatibuk-ang Caraga State University kon CSU human subli nilang napamatud-an nga ang ilang tunghaan mao na ang ‘Home of the Top Notchers.
Nasayran nga upat sa Top 10 sa 2022 Geodetic Engineer Licensure Examination ang gikan sa maong tunghaan nga gilangkuban sa No. 3 nga si Deamark Jhone Palaran nga dunay 90.60% rating; No. 6 nga si Kent Lloyd Mañoza sa 89.60% rating; No. 7 usab si John Carl Escasio sa 89.40% rating, ug No. 9 nga si Albert Dalman nga dunay 88.80% rating.
Gawas niini, nakakuha usab og 86.71% nga passing rate usab ang Caraga State University human nga 118 gikan sa 136 nila ka mga takers ang mipasar.
Nabutang pa sa ika-upat ang CSU sa listahan sa top performing schools sa Geodetic Engineering Licensure Examination tungod sa kadaghan sa ilang mga takers karong tuiga.
Sa pakighinabi sa Bombo Radayo Butuan, gipa-ambit ni Engr. Mirriam Santillan, Dean sa College of Engineering and Geosciences sa Caraga State University ang ilang gihimong mga pagpangandam adiser mi-exam ang ilang mga graduates.
Sumala pa ni Engr. Santillan, tinguha gayud sa tunghaan nga dili lang mag-provide og mga graduates kundi de-kalidad nga mga graduates.
Tungod niini, naningkamot ang tibook kadumalahan sa CSU sa pag-motivate sa matag-estudyante ilabina kay kasagaran sa mga niini dili gikan sa adunahang pamilya taliwa sa pandemyang hatud sa Covid-19.
Nag-implementar matud pa sila og libre nga review classes nga magsilbing refresher course aron mahimong mas andam ang mga niini sa pagkuha sa board examination.
