BUTUAN CITY-Nakatala og upat ka patay sa COVID-19 ang Caraga Region kagahapong adlawa samtang miabot 32 ang mga bag-ong kaso.
Sumala sa DOH-Center for Health Development Caraga gilangkuban ang mga bag-ong kaso sa 21 ka mga babae samtang 11 ka mga lalake diin one year old baby ang pinakabata ug 70-anyos ang pinaka-edaran.
Sa 32 ka mga bag-ong kaso 24 niini ang nagsumikad dinhi sa Butuan , pito ang sa Agusan del Norte ug usa sa Surigao del Sur. Gikan usab dihni syudad ang duha sa upat ka mga natalang patay samtang ang laing duha nagsumikad sa probinsya sa Agusan del Sur.
Ang mga pulos nakasinati og COVID-19 related symptoms ug tungod sa komplikasyon namatay lang usab.
Tungod sa bag-ong development milansang na sa 6,991 ang kinatibuk-ang kaso sa COVID-19 sa rehiyon lakip na niini ang 810 pa ka mga aktibong kaso.
Misaka usab hinuon sa 5,896 ang mga nimaayo human nadungagan og 111 samtang misampa na 285 ang mga namatay.
