BUTUAN CITY – Nakasakmit na karun ug 3 ka medalya ang delegado sa Caraga sa Palarong Pambansa 2017 sa Antique.
Una nang nakakuha ug silver medal sa gymnastics ang grade 3 pupil nga si Rowly Arjel Raut-Raut sa Tungao Central Elementary School kansa ilawom sa Butuan City division.
Gisundan kini sa nakuhang Bronze medal sa gymnastics gihapon sa female group sa elementary level nga gilangkuban nila Salsate, Andaya ug Arcilla ug laing bronze medal sa samang contest. Gipaabot usab ni Elizalde Bernales, Regional Information Officer sa Department of Education kon DepEd-Caraga ang maayong dagan sa elimination round sa atleta gikan ning rehiyon.
Sama nalang sa basketball secondary men’s diin midaug sila kontra sa Central Visayas sa iskor nga 59-57 samtang daug usab kini sa iskor nga 90-69 batuk sa Rehiyon 10.
Midaug usab sa elimination round ang pambato sa Caraga sa dulang lawn Tennis, Badminton ug Sepak Takraw samtang dunay finalists usab ang Caraga para sa bulawang medalya sa gymnastics.
Samtang tungod sa kalayu sa billiting kwarter ngadto sa venue nga muabot sa 49 ka kilometros, gidala nalang nila ang mga gamit sa mga atleta ug nangetag tunghaan nga mas dool sa venue.
Tumong niini nga dili na mahago sa taas nga biyahe ang mga atleta. Apan gipaneguro ni Bernales nga anaa sila sa maayong kahimtang tungod sa hugot nga pagpatuman sa seguridad.
