BUTUAN CITY – Padayon pang gipanubayan sa ginsakpan sa Butuan City Police Station kon BCPS-3 ang mga tawong na-angol human gidaro sa kolor maroon nga kotseng Hyundai nga nagtangag sa plaka KCH 601 ang upat ka mga motorsiklo, usa ka traysikol ug usa ka kotse kagabii sa Brgy. Libertad ning siyudad.
Nasayrang unang gidumbol sa wala pa mailang driver sa kotse ang duha ka nakaparada lang nga motorsiklo dapit sa Sto. Nino Shrine, kondiin ang usa gisakyan sa magtiayon nga nalagpot ug milahos pa ang kotse sa pipila ka stalls sa mga balut ug barbecue vendors.
Sigon sa balut vendor nga si Elvira Cosme kinsa usa sa mga unang nakakita sa pagbangga, naka-angkon matod pa og bali sa tiil ang usa ka mamdos nga nagrambol sa motorsiklo ug usa pa ka bata ang nadamay.
Sigon sa laing saksi nga si Francis Sandro Rosales, layo pa lang ang maong kotse, nakita na nilang nag-ikis-ikis na ang dagan niini hangtud nga naharos na ang pipila ka mga motorsiklo ug kotse kondiin nabantayan pa sa uban nga nagkatawa pa ang suspek samtang gibanggaan ang mga motorsiklo.
Samtang gibutyag usab ni Jake Trillo nga diha pa lang dapit sa Sto Niño Shrine, duna na’y nabanggaan ang wala pa ma-ilhing driver kansa inisyal lang nasayran nga taga-Emily Homes sa Brgy. Libertad ning siyudad kondiin nag-siga-siga pa ang motorsiklong nadaro gikan sa City Sports Complex padulong sa Crossing sa Brgy. Bonbon diin gibiyaan lang sa driver ang mga nabanggaan ug pasulod na unta sa Brgy. Bonbon apan sa tulay pa lang nga bahin, mibangga na kini sa signage duol sa lotto outlet human nawad-an og kontrol.
Sa asoy usab ni Adrian dali nilang gigukod ang harabas nga driver uban sa laing nakasaksi aron unta kini patubagon ug kulatahon apan nakauna pag-abot ang mga pulis.
Nasayrang tungod sa grabeng kahubog, wala na makatindog pa ang suspek rasong gidayungan na lang kini sa mga pulis padulong sa Butuan City Police Station 3 alang sa tukmang disposisyon.
