BUTUAN CITY – Gikumpirma ni Libertad, Butuan City Brgy. Kapitan Menchie Rosario nga naka-isolate siya karon uban sa lain pang mga staff sa ilang barangay hall human namatay ang ilang barangay clerk samtang na-ospital usab ang iyang kapikas sa kinabuhi.
Sa eksklusibong pakighinabi sa Bombo Radyo Butuan, gipadayag ni Kapitan Rosario nga wala siya’y kagahom nga mudeklara sa rason sa pagkamatay sa ilang clerk ilabina sa gikahadlukan sa iyang mg constituents nga COVID-19 tungod kay bugtong makadeklara niini mao lamang ang Department of Health kon DOH-Caraga.
Dugang ni Kapitan Rosario, gawas kaniya og sa iyang staff, naka-house quarantine usab ang lima niya ka mga barangay health workers kon BHW samtang nagbulat sa pagpa-ilalom nila sa swab test.
Giklaro ni Kapitan Rosario nga nagnegatibo sila sa gipa-ilawman nilang rapid test apan gitambagang mag-isolate isip pagsunod sa health protocols ug alang na usab sa kaluwasan sa tanan.
