BUTUAN CITY – Gisaulog karung adlawa, Hulyo 6, 2026 sa Bombo Radyo Philippines ang makasaysayanong ika-60 anibersaryo niini—unom ka dekada nga walay hunong nga pagserbisyo sa katawhang Pilipino pinaagi sa matinuoron, paspas, ug kasaligan nga pagbalita.
Sukad sa pagkutukod niini niadtong Hulyo 6, 1966 pinaagi sa visionary founder nga si Don Marcelino M. Florete Sr. ug sa kasamtangang kadumalahan ni Dr. Rogelio M. Florete, Chairman sa Bombo Radyo Philippines, milambo ang Bombo Radyo gikan sa usa ka estasyon ngadto na sa PINAKALIG-ON ug PINAKAKASALIGAN nga radio network sa nasod.
Sa pagkakaron, duna na kini 32 ka fully digitalized nga mga estasyon sa AM ug FM sa 25 ka mga nag-unang dapit sa tibuok Pilipinas.
Sulod sa unom ka dekada, nahimong mahinungdanong bahin sa kinabuhi sa minilyon ka mga Pilipino ang Bombo Radyo.
Sa panahon sa kalamidad, piniliay, nasodnong krisis, ug bisan sa mga higayon sa kasaulogan, nagpabilin kining nag-unang gikuhaan sa balita, impormasyon, komentaryo, ug serbisyo publiko.
Labaw pa sa broadcasting, padayon usab nga gipalambo sa network ang mga programa nga naghatag og direktang serbisyo sa mga lungsuranon sama sa Bombo MEDICO—ang medical, dental, and optical program; DUGONG BOMBO—ang tibuok-nasod nga kampanya sa pagpakuhag dugo (bloodletting); ug ang BOMBO MUSIC FESTIVAL nga nagpasiugda sa Original Pilipino Music.
Giila usab ang Bombo Radyo Philippines sa nagkalain-laing institusyon tungod sa kamaayu niini sa pagbalita.
Lakip niini ang pagkapili sa Bombo Network News isip Best News Program sa Catholic Mass Media Awards niadtong 2024 ug 2025, ingon man ang pag-ila niini isip Radio Network of the Year sa Rotary Club of Manila sa 2026 Pro Patria Journalism Awards.
Sa pagsaulog sa ika-60 nga anibersaryo, subling gipalig-on sa Bombo Radyo Philippines ang saad niini nga magpabilin nga numero uno ug kasaligan nga kakuhaan sa balita ug impormasyon—padayong nagduso sa balanseng komentaryo, patas nga pagbalita, ug mahinungdanong serbisyo publiko alang sa matag Pilipino.
Sulod sa 60 ka tuig, usa ra ka ngalan ang nagpabilin nga kauban sa tibuok nasod—Bombo Radyo Philippines. Usa ka ngalan nga tinuod gayod nga nahimong Pamantayan sa Kinabuhi (A Way of Life) sa mga Pilipino.
BASTA RADYO… BOMBO!
