BUTUAN CITY – Gipahibalo ni Ma. Kristina Cassion, OIC-regional director sa Land Transportation, Franchising and Regulatory Board kon LTFRB-Caraga nga sugod karong Agosto 10, duna na’y biyahe gikan sa Butuan City ngadto sa Cagayan De Oro ingon man ngadto sa Davao City ug vice versa.
Sa eksklusibong pakighinabi sa Bombo Radyo Butuan, gipadayag sa opisyal nga duha lang ka biyahe ang tugutan sa nasangpit nga mga ruta isip pagsanong usab sa hangyu sa mga hingtungdang local governments sa maong mga siyudad tungod kay dili matud pa kaya sa ilang quarantine facility ang mangabot nga mga indibidwal.
Bawal usab sa maong mga ruta ang pag-pick-up ug pasahero kondiin ang mga pasulod ning siyudad, kinahanglang didto ideretso sa holding facility nga mao ang terminal aron didto na usab manakayan padulong sa mga barangay nga ilang adtuan diin anaa na ang quarantince facility.
Sa kasamtangan, duna nay nagbiyahe sa rutang Surigao City padulong sa Davao CIty ingon man ngadto sa Cagayan De Oro, Tandag City ngadto sa Davao City ug ngadto sa Cagayan de Oro CIty ug vice versa.
