BUTUAN CITY – Misabay ang Pinay girl goup nga BINI sa kanta nga “A Parallel World” uban sa Filipino-American singer nga si AJ Rafael ug iyang asawa nga si Alyssa sa usa ka press event sa pelikulang Forgotten Island sa California. Sa video nga gi-post ni AJ Rafael sa Instagram, makita nga siya nagtugtog og gitara samtang nagkanta sila sa maong awit.
Human pipila ka gutlo, misalmot ang walo ka miyembro sa BINI sa pag-awit sa chorus nga nakapahimuot sa daghang fans.
Matod pa ni AJ Rafael, dako iyang garbo nga makita nga daghang Pilipino ang kabahin sa usa ka proyekto sa DreamWorks kondiin nagkomento usab ang lead star sa pelikula nga si Liza Soberano, nga nalipay sa performance sa mga Filipino artist ug gi-share ang video sa iyang social media.
Unang gipa-ila sa BINI ang kantang “A Parallel World” sa ilang “Signals” concert niadtong Hunyo.
Ang Forgotten Island nagsaysay sa istorya sa duha ka suod nga higala nga sila Raissa ug Jo, nga gihatagan og tingog nila Liza Soberano ug H.E.R., uban sa ubang sikat nga artista sama nila Lea Salonga, Dolly de Leon, Manny Jacinto, Jo Koy, Jenny Slate, Dave, ug Ronny Chieng.
