BUTUAN CITY- Gipahigayon sa Butuan City Development Council ang paglatid sa mga plano alang sa padayong kalambuan sa dakbayan atol sa 1st Semester 2026 Full Council Meeting diin gihisgutan ug giaprobahan ang mga prayoridad nga programa ug proyekto alang sa tuig 2027.
Gipangulohan ni Butuan City Mayor Lawrence Lemuel “Law” Fortun uban ni Vice Mayor Reynante Desiata ang maong tigom nga gitambongan usab sa mga miyembro sa Sangguniang Panlungsod ng Butuan ug mga representante gikan sa nagkadaiyang sektor. Gipresentar sa matag sectoral chairperson ang ilang Annual Investment Program (AIP) 2027 nga naglangkob sa mga programa alang sa economic development, tourism promotion, job generation, livelihood initiatives, environmental protection, disaster preparedness, social services, good governance, ug climate-adaptive infrastructure projects aron mas mapalig-on ang serbisyo publiko ug mapalambo ang kalidad sa kinabuhi sa mga Butuanon.
Lakip usab sa giendorso sa council ang Local Shelter Plan 2024-2028, Food Security and Contingency Plan 2026-2034, Local Nutrition Action Plan 2026-2028, ug ang Butuan City Pedicab Route Plan 2026-2027 nga ipadala ngadto sa Sangguniang Panlungsod ng Butuan alang sa hustong legislative action. Gihatagan usab og higayon ang mga barangay nga mapadayag ang ilang concerns ug mga hangyo aron matubag pinaagi sa koordinasyon sa mga department heads ug lokal nga panggamhanan alang sa mas episyente ug organisadong serbisyo sa komunidad.
