BUTUAN CITY- Landing sa balay tambalanan ang usa ka batang lalaki human aksidenting natusok sa puthaw nga kural ang tuhod niini sa covered court sa Brgy. Panatao, Claver, Surigao del Norte pasado alas 6:50 ning nakalabay nga gabie.
Ang 11-anyos nga batang wala na panganli, residente sa nasangpit nga lugar.
Subay sa imbestigasyon sa kapulisan, pauli na unta ang bata sa ilang balay dihang miagi kini sa kural nga adunay mga talinis agi sa covered court area pinaagi sa pag-ambak apan aksidenti na hinuong natusok ang tuhod niini.
Nabitay pa ang bata ug ningpyait sa grabe ka sakit nga nabati human ang insidente.
Migamit pa ang taga-Bureau of Fire Protection og grinder aron maputol ang puthaw nga nakatusok dapit sa iyang tuhod.
Anaa na sa usa ka ospital sa Surigao City ang bata alang sa pagtangtang sa nagta-op pa nga puthaw.
