BUTUAN CITY – Gi-andam na ang posibling kasong ipasaka batuk sa usa ka barangay tanod nga miluba patay sa usa ka lalaki kagabii sa may Barangay Jaguimitan, lungsod sa Nasipit, Agusan Del Norte.
Sa pakighinabi ning sibyahan kang SPO2 Romaguera, sa Nasipit Municipal Police Station, gikan matud pa sa usa ka videokihan ang biktimang si Michael James Dao-ay, 23-anyos dunay kapuyo ug residente sa maong dapit kauban ang mga ka-inom niini, sa dihang nanghagit kini ug away.
Dinhe na siya gibadlong sa Chief Tanod nga si Julito Radaza apan gikasuko kini sa biktima ug gibunlot ang maong tanod.
Sunod nga nibadlong ang laing tanod nga si Rodrigo Caballero, 68-anyos apan gisumbag matud pa siya sa biktima hinungdan nga iya kining nadunggaban gamit ang kutsilyo.
Na-igo ang biktima sa walang bahin sa iyang dughan nga miresulta sa hinanaling kamatayon.
Gikustudiya na ang suspek sa Nasipit Municipal Police Station alang sa tukmang disposasyon samtang gipahiluna na usab ang patay’ng lawas sa biktima nga pagahayaon sa maong barangay.
