BUTUAN CITY – Nakuhaan og usa ka magnum 357 revolver uban sa unom ka mga buhing bala sa kalibre punto-38 nga pistola ang usa ka banana vendor human ang inter-driven operation kaganina lang sa search warrant nga gi-isyu sa sala ni Judge Izah Echem-Tangonan.
Kini human migawas sa pakisusi sa ginsakpan sa Butuan City Police Station kon BCPS-4 nga wala’y lisensya ang maong armas dihang nakadawat og reklamo gikan sa usa ka indibidwal.
Daling gidala ang maong mga armas sa BCPS-4 apil ang nadakpang si Florencio Patayon Jr., 35-anyos, duna’y ka-ipon ug residente sa Purok Sidlakan, Brgy. Sto. Niño ning siyudad sa Butuan.
Tungod niini, gibutyag ni station commander PCapt. Rodel Dorado nga pasakaan na unya nila og kaso ang suspek nga maol ang paglapas sa Republic Act 10591 kon illegal possession of firearms and ammunition.
Samtang gibutyag usab sa suspek nga giprenda lang kaniya ang maong armas ug gipa-abot gani niya nga lukaton na kini aron iya na usab nga gamiton pag-finance og basakan hangtud nga na-abtan na kini sa operasyon sa kapulisan.
Aminado kining kanunay niya kining dala-dalahon ilabina kung mangumpra siya og saging isip depensa tungod kay duna’y h igayong nga magabhi-an siya pagpa-uli.
