BUTUAN CITY – Muabot na sa P4,000,000.00 nga kantidad sa shabu ang nakumpiska sa managlahing operasyon sa Philippine Drug Enforcement Agency kon PDEA-Caraga ning semanaha lang.
Sigon ni PDEA-Caraga information officer Dindo Abellanosa, magpadayon pa ang ilang anti-illegal drug operations ilabina kay dunay mga nalambigit sa ilegal nga drugas nga nagpadayon sa transaksyon ug walay planong magbag-o.
Sumala sa opisyal, hugot ang ilang monitoring sa tibook rehiyon ilabina sa probinsiya nga wala pa na-drug cleared nga mao ang Surigao Del Norte diin natigayon ning mi-aging adlaw ang buybust operation particular sa lungsod sa Dapa nga misangpot sa pagkasikop ni Ricky Gerarcas kinsa nakuhaan og shabu nga mitimbang og 51.57 gramos nga mikantidad og kapin 600-mil pesos.
Ang siyudad usab nga wala pa na drug cleared mao ang Butuan City diin nahitabo ang ikaduhang buybust operation kagahapong adlaw particular sa P-Almasiga, Brgy. Pangabugan nga miresulta sa pagkasikop nila Jayson Peras ug Ker Sanchez diin 73.0235 gramos nga shabu ang nakuha.
Gi-andam na ang kasong pagpasaka batuk sa mga nadakpang indibidwal.
