BUTUAN CITY – Mukabat sa 400-mil pesos nga kantidad sa shabu ang nakuha sa mga otoridad sa gipahigayong drug buy-bust operation pasado alas-9:35 kagabii sa may Purok 4, Brgy. Libertad ning siyudad sa Butuan.
Naila ang nadakpan nga si Manolito Crisostomo, kinsa usa ka high value target ug nakuhaan og 50-gramos nga shabu, uban ang usa ka libo ka pesos nga buy bust money, 159 ka buok nga tag-usa ka libo ka pesos usab nga boodle money ingon man cell phone nga maoy iyang gigamit sa pakigtransaksyon.
Sa eksklusibong pakighinabi sa Bombo Radyo Butuan, gipadayag ni Dindo Abellanosa, tigpamaba sa Philippine Drug Enforcement Agency kon PDEA- Caraga nga taud-taud nang gi-surveillance ang dinakpan hangtud nga mi-abot ang takna nga gi-operisyunan siya uban ang mga sakop sa Butuan City Police Station kon BCPS-3.
Gikonsidera matud pa kining high value target tungod anaa na kini sa ilang target list tungod sa taas na nga disposal niya sa ilegal nga druga.
Kasong paglapas sa section 5 sa RA 9165 ang atubangon sa suspek kinsa anaa na sa custodial facility sa PDEA-Caraga alang sa tukmang disposasyon.
