BUTUAN CITY – Padayon pang gipangita sa mga otoridad ang 26-anyos nga si Fernan Bokingo, residente sa Purok 1, Brgy. Bobon human niini gipatay ang iyang ka-ipon nga si Jolamae Ebale, residente sa Brgy. Maug, parehong sakop ning siyudad.
Sigon sa igsoon sa suspetsado nga si Christopher Bokingo, kanhi kagawad sa maong barangay, kanunay nang mag-away ang duha nga grabe matud pa kasaba ug maglinagubo pa ang sulod sa ilang panimalay hangtud nga niadtong Lunes sa buntag, mi-adto na sa barangay office ang biktima ug nangayo og barangay protection order.
Dihang gidalikyatan sa mga barangay officials ang lugar sa magti-ayon, ilang gikatingala nga nakapaduol sa maong lugar ang suspetsado rason na ila kining gihangyo nga ipagawas si Jolamae aron masulihan nga bawal matud pa silang magduol.
Misulod matud pa sa ilang panimalay ang suspek apan wala na makagawas og balik rason nga gisulod na kini sa mga barangay officials uban ang pipila ka pulis ug didto na nakita ang patay’ng lawas sa biktima nga anaa sa ilang kutson ug gitabunan na.
Posible matud pang gibunalan ang likod sa ulo sa biktima tungod sa samad niini ug sa napalgang kahoy nga duna’y lama sa dugo apan padayon pang gisuta sa kapulisan kung gi-unsa pagpatay ni Bokingo ang iyang ka-ipon.
