BUTUAN CITY – Gipa-atubang sa ika-129 nga regular session sa 19th Sangguniang Panlalawigan sa Agusan del Norte si Agusan del Norte Electric Cooperative, Incorporated kon ANECO general manager Engr. Darwin Daymiel. Kini aron mapasabot ngadto sa mga Agusanons ang gika-ingong dili matud pa tawhanon ug dili maki-angayon nga pagpamutol nila sa kuryente dili makabayad sa usa ka bulan.
Kini partikular nga gireklamo ni Agusan del Norte Board Member Atty. James Reserva pinaagi sa iyang privilege speech human nabiktima sa pagputol sa kuryente niadtong Abril 25 ning tuiga tungod kay wala matud pa sila’y nadawat nga notice kondiin sa maong adlaw, daghan usab ang mga giputlan sa ANECO didto sa lungsod sa Buenavista.
Atol sa regular session sa Committee of the Whole sa Sangguniang Panlalawigan, aminado si Engr. Daymiel, nasabtan nila ang reklamo. Gipasabot niini nga nakalatid matud pa sa Magna Carta for Residential Electricity Consumers nga tagaan pa og siyam ka mga adlaw ang member-consumers pagbayad sa ilang obligasyon adiser putlan gikan pagkadawat niini sa ilang bill.
Ang dili makabayad, kinahanglang hatagan og notice adiser kini putlan kondiin ang maong paagi ila nang gilahisukwahi sa na-andan nga anaa ra sa billing nga dunay arrears kini i-stipulate, rason nga dili mabasahan sa mga kunsumante.
Subay niini, gihangyo na lang sa opisyal ang mga kunsumante nga mohatag sa ilang contact number aron ma-apil kini sa mga text blast nga magpahibalo kung kanus-a ug asang dapita sila mamutol.
Dugang sa opisyal nga taliwala pa man sa ka istrikto sa ilang kompanya, andam gihapon silang maminaw sa mga kunsomante ug modawat og promissory note ugaling maglisod na og bayad, basta dunay balidong rason.
Misaad usab si Engr. Daymil nga taman na lang karong bulana masinatian sa mga kunsumador ang taas nga bayrunon kansa mugna sa adjustment nga gihimo ang ilang power supplier, rason nga dunay pagsaka sa P0.70 sentabos ang billing sa kuryente ning bulana.
