BUTUAN CITY- Gibutyag ni US President Donald Trump nga luwas ug himsog ang usa ka Amerikanong crew member nga naluwas human mahagsa ang sakay nilang F-15 fighter jet sa habagatang Iran.
Ang operasyon sa pagluwas misangpot sa engkwentro tali sa pwersa sa US ug Iran samtang nagdali ang duha ka nasud sa pagpangita sa airman, diin giingon nga nag-offer pa ang mga opisyal sa Iran og cash reward alang sa makakaplag kaniya nga buhi. Naluwas na ang piloto nga kauban sa eroplano sa mas sayo pa.
Ang insidente nagpalala sa tensyon samtang nagbinayloay og hulga ang US ug Iran nga magpagawas og mas grabe nga opensiba, ilabi na human gipahimangnohan ni Trump nga mas mograbe ang mga strike kon dili motugot ang Iran sa pag-abli pag-usab sa Strait of Hormuz sulod sa 48 ka oras, kansa gihimakak usab sa Tehran.
