BUTUAN CITY – Mi-abot na sa 13 ang kaso sa Andes hantavirus, lakip ang tulo nga namatay ig sa maong ihap, 11 ang kumpirmadong kaso base na sa resulta sa laboratory rest ug duha ang probable cases.
Kini mao na ang ika-upat nga report kalabot sa cruise ship travel, human gipahibalo sa WHO niadtong Mayo 2 ang mga kaso sa grabe nga respiratory illness sa barkong M/V Hondius. Sukad niadtong Mayo 13, tulo ka bag-ong kumpirmadong kaso ang nadugang gikan sa Canada, Netherlands, ug Spain.
Ang usa ka inconclusive case gikan sa US nga napamatud-ang negatibo ug natangtang sa listahan.
Tungod sa taas nga incubation period nga moabot og unom ka semana, gilauman nga adunay bag-ong kaso nga mogawas hangtod matapos ang maong panahon.
Pinaagi sa International Health Regulations (2005), nakig-uban na ang mga National IHR Focal Points aron suportahan ang international contact tracing ug monitoring. Sumala sa WHO, gamay lang ang risgo sa outbreak sa tibuok kalibutan, apan padayon nilang bantayan ang sitwasyon ug maghatag og update kung kinahanglan.
