BUTUAN CITY – Padayon pang gipanubayan sa tribong Manobo Lapaknon ang usa ka lalaking namusil samtang anaa sa uma sa ilang supremo kaganinang alas-dies sa buntag sa Purok 9, Brgy. Maug ning siyudad sa Butuan nga mi-angol sa anak niining lalaki.
Sa eksklusibong pakighinabi sa Bombo Radyo Butuan, gipadayag sa gi-ilang Supremo sa maong tribu nga si Reynante Asaytona, residente sa Brgy. Banza ning siyudad, padulong sila sa iyang pamilya uban ang duha niya ka mga bagani sa ilang umahan aron mananggi og mais.
Nabantayan niining duna’y tawo sa ilang kamalig apan wala sila makaderetso human nga nalubong sa lapok ang ilang gisakyang multicab rason nga mi-una og baktas ang iyang pamilya nga gilangkuban sa iyang asawa, mga anak apil ang iyang apo.
Dinhi na naklaro sa iyang asawang si Bai Yaun-Yaon ang lalaking duna’y bitbit nga kalibre .45 nga pistola kinsa gipangutana pa niya kung kinsa kini ug unsa’y tuyo.
Dihang misulti kining wala’y lain niyang tuyo kondili ang supremo, mibalik sa agi si Bai Yaun-Yaon dayong sumbong sa iyang bana nga dili mupadayon rason nga dali silang misakay sa motorsiklo dayong tawag og police assistance.
Posible matud pang na-ulit ang gunman dihang wala kini giduol sa mga bagani nga gusto niyang istoryahonrason nga nagpabuto sa dalang armas diin na-igo sa tiil ang kinamanghuran niining anak nga karon anaa na sa ospital samtang padayon pang gipanubayan ang suspek nga daling misibat human sa hitabo.
