BUTUAN CITY – Gipanghimakak sa mga kanhi sundalo ang pasangil ni National Bureau of Investigation kon NBI Director Melvin Matibag nga gisuhulan sila ni kanhi Congressman Mike Defensor aron lang mutestigo sa imbestigasyon sa anumalusong mga flood control projects.
Nasayrang samtang nagpadayon ang hearing sa komite,nagpagawas og video statement si Matibag kondiin iyang gibutyag nga duna matud pa sila’y nadawat nga impormasyon nga gisuhulan matud pa og tag-5 milyones pisos ang 18 ka mga kanhi Marines aron lang tumestigo.
Kini dayong butyag nga ila pa usab kining giberepika nga impormasyon rason nga ilang gi-isyuhan og subpoena si kanhi Anak Kalusugan partylist Rep Mike Defensor kinsa maoy gitudlo nga nanuhol matud pa sa maong mga kanhi sundalo aron mu-atubang sa publiko.
Apan atol sa pagdungog, giklaro ni Johnny Buduan, usa sa 18 ka mga kanhi marines nga mi-atubang isip resource person, wala sila mudawat og kwarta gikan kang kanhi Cong. Mike Defensor human gipangutana ni Senador Rodante Marcoleta.
Gihagit pa ni Buduan ang nagpasangil kanila nga mu-atubang sa pagdungog sa komite aron pamatud-an ang maong alegasyon.
Gidugang pa niini nga nindot na unta ang ilang kinabuhi kung midawat pa sila sa maong dakong kantidad nga kwarta dayong butyag nga ang ilang gihimo, boluntaryo tungod kay gusto nilang matul-id na ang grabe kahiwi na nga pagpadagan karon sa nasud.
Dali usab nga gidepensahan ni Atty. Levito Baligod ang mga kanhi sundalo gikan sa maong alegasyon.
