BUTUAN CITY – Gi-activate na karon sa Iran ang ilang air defense missiles human ang pagtira na og missiles sa Israel isip balos sa ilang gihimong drone ug missile attacks ning mi-aging Dominggo sa kaadawon -oras sa Pilipinas.
Sigon sa state-run nga Fars news agency sa Iran, mitira na ang ilang nasud og mga air defence batteries ngadto sa pipila nila ka mga probinsya kondiin duna’y milanog nga mga pagbusikad sa Isfahan province.
Samtang gibutyag usab sa Iranian Airports and Air Navigation Company nga pipila ka mga flights na usab ang gisuspende ilabina sa mga siyudad sa Tehran, Isfahan ug Shiraz.
Gawas niini, duna usa’y mga reports nga duna’y pagbusikad sa Syria ug Iraq.
Sigon sa tigpamaba sa space agency sa Iran ubay-ubay nga mga drones ang ilang napahagba.
Natigayon ang missile attacks human naglusad ang Iran og sunod-sunod nga drones ug missiles attacks sa Israel isip balos sa gika-ingong Israeli attack sa ilang konsulada sa Syria niadtong Abril 1 nga mikalas og 13 ka mga tawo apil na ang duha ka heneral sa Islamic Revolutionary Guard Corps sa Iran.
