BUTUAN CITY – Hingpit nang gisira ang Agusan Plywood Corporation kon APC sa may Brgy. Manapa lungsod sa Buenavista, Agusan del Norte human na-apektuhan sa COVID-19 pandemic.
Sa eksklusibong pakighinabi sa Bombo Radyo Butuan, gibutyag ni Elmer Maboloc, Municipal Administrator sa Municipal Government sa Buenavista, nakadawat sila og notice nga nagpahibalo kanila sa paghunong na sa operasyon sa APC tungod sa hinay nga delivery sa mga kahoy ug nadugangan pa karon sa problema sa pandemya sa tibook kalibutan.
Sigon ni Maboloc, sa pagdesisyon sa maong kumpanya, gi-adtuan gilayon kini sa mga personahe sa Department of Labor ang Employment kon DOLE-Caraga aron makuha ang kompletong listahan sa mga trabahante niini.
Gikasubo sa kapitan sa maong barangay ug sa local government unit kon LGU ang pagsira tungod sa dakong natabang niini ngadto sa mga residente dili lang sa maong barangay kondili apil na sa uban pang mga barangay sa lungsod ug kasikbit nga mga lungsod niini.
Dugang ni Maboloc, dako og natabang ang APC sa panudlaan sa lungsod apan wala na matud pa sila’y mahimo rason nga gitakda sa tunga-tunga ning buwan sa Agusto ang pagbayad sa mga empleyadong apektado sa maong pagsira.
