BUTUAN CITY – Wala pa mag-sink in kang Atty. Luke Martin Burdeos, anak ni kanhi Butuan City Councilor Rema Burdeos ang iyang nakab-ot nga kalampusan human mipasar sa 2022 bar examination.
Sa eksklusibong pakighinabi sa Bombo Radyo Butuan, gibutyag sa bag-ong abogado nga tumang kalipay ang iyang gibati tungod kay natapos na ang tanan niyang kahago gikan pa sa pagtungha, hangtud na sa pag-gradwar ingon man pag-review ug pag-take na sa maong eksaminasyon.
Dawat niya ang mga sakripisyong iyang nasugatan sa iyang journey ngadto sa kalampusan, tungod kay nakatutok man siya nga kab-uton gayod ang iyang damgo.
Human matud pa niya og pirma sa Roll of Attorneys, mubalik siya sa Cebu City aron musulod sa mga law firms sa ingon makabaton siya og bisan duha ka tuig nga practice sa iyang propesyon.
Kung hatagan og higayon, gusto niyang muserbisyo sa Public Attorney’s Office kon PAO-Caraga aron maserbisyuhan ang mga nag-atubang og kaso apan wala’y ika-afford pagkuha og private lawyer.
Gusto usab niyang i-correct ang sayop nga panglantaw sa mga tawo nga ang abogasya alang lang sa mga abogado kondili alang mismo sa mga tawong imong serbisyuhan alang sa hustisya ug ka-angayan.
