-- ADVERTISEMENT --

BUTUAN CITY- Gikuwestiyon ni Vice President Sara Duterte ang pamahayag sa hepe sa Philippine National Police (PNP) nga nagpabiling apolitical o walay gidapigan sa politika ang nasudnong kapulisan, ug giakusahan ang institusyon nga naglihok na hinuon isip tigpatuman sa interes sa mga politiko.

Sa opisyal nga pamahayag sa Office of the Vice President (OVP) niadtong Nobyembre 21, 2026, gibatikos ni Duterte ang gilayon nga pagdeklarar sa PNP Chief nga walay nahitabong rescue operation bisan wala pa mahuman ang hingpit nga imbestigasyon sa insidente.

Matud pa sa Bise Presidente, wala man lang kini o ang ubang indibidwal nga nalambigit sa insidente gipangoyan og pamahayag, kansa nagpatungha kaniya og mga pangutana bahin sa pagkamatarong ug pagsunod sa due process sa kapulisan. Gibutyag usab ni Duterte nga adunay labing menos lima ka dokumentadong hulga nga giingong naggikan sa pipila ka miyembro sa PNP batok kaniya, sa mga kawani sa OVP ug sa iyang pamilya, apan wala matud pa sila makaduol sa kapulisan aron mangayo og tabang.

Dugang pa niini, posibleng dili na niya mapresentar ang maong mga ebidensiya atol sa impeachment proceedings human gibawi sa prosekusyon ang reklamo nga grave threats batok kaniya, kansa gihulgway niini nga walay lig-ong basihan sa kamatuoran ug balaod.

Giawhag usab sa Bise Presidente ang hepe sa PNP nga imbis panalipdan ang mga anaa sa gahum, unahon hinuon ang ilang mandato nga patas nga manalipod sa matag lungsoranon. Samtang, wala pa magpagawas og opisyal nga tubag ang PNP kalabot sa mga alegasyon ni Duterte.

-- ADVERTISEMENT --